SEKILAS TUTUR DAN ADAT KARO

 

MERGA SILIMA, RAKUT SITELU, TUTUR SIWALUH, PERKADE-KADEN SEPULUH DUA TAMBAH SADA

 

Sitek tambahen kerna merga silima, rakut sitelu, tutur siwaluh ras Perkade-kaden sepuluh dua tambah sada.

Bas kalak karo nai lit ibahan tua-tua si arah lebe merga si asal katana meherga igelari jadi Merga. Enggo itetapken Sinai merga ibas Kalak Karo lit lima Merga janah tiap-tiap merga lit kerina cabang-cabangna ras uga sejarahna kerna cabang-cabang enda. Merga silima emekap

1 . Merga Ginting

2. Merga Karo-karo

3. Merga Tarigan

4. Merga Sembiring

5. Merga Perangin-angin

Merga Silima enda banci i rakut alu rakut sitelu emekap:

1. Kalimbubu, l anologiken / iandingken kutakal jelma

2. Sembuyak, l anologiken ku beltek jelma

3. Anak Beru, l anologiken ku nahe ras ku tan jelma.

Endam si i kataken Rakut Sitelu janah melala ka pe deba I anologiken ku

daliken sitelu. Ibas tua-tua siadi iperas ka rakut sitelu enda jadi tutur si

waluh emekap Kalimbubu ndai jadi telu, emekap

1. Kalimbubu

2. Puang Kalimbubu

3. Puang Nipuang

Sembuyakna I jadikenna dua, emekap :

1 . Sembuyak

2. Senina

Anak Beru ndai jadikenna telu, emakap:

1.       Anak Beru

2.       Anak Beru Menteri

3.       Anak Beru Pengapit /Singukuri

 

Kesimpulen  : 3 + 2 + 3 = 8, siwaloh endam ikataken Tutur Si Waloh.

Jenari siwaloh ndai ijadikenna sepuluh dua emekap senina ijadikenna lima emekap

1. Senina Kuranan

2. Semna Sipemeren

3. Senina Siparibanen

4. Senina Sendalanen

5. Senina Sepengalon

Kesimpulen : 8 + 4 = 12, Endam sinikataken tua-tua siadi perkade-kade sepuluh dua

Tambah sada emekap TEMAN MERIAH

Penjelasen pengertian senina ( No. 1 — No. 5)

1.       Senina Kuranan, emekap sisada merga ras sukut, tapi itetapken secara adat rikut ras ibulangi gelah enggo lit tanggung jawabna setiap runggun tahpe ranan,  Biasana ibuatna Tegun Senina na I luar dari sukutna.

2.       Senina Sipemeren emekap, ersenina erkiteken senina nandeta, lebih luas ka sipemeren bapanta tah pe lakinta bagepe sipemeren nandeta.

3.       Senina Siparibanen, emekap erkiteken erserina endeharata.  Lebih luas ka, banci ikataken adi siparibanen bapanta dan seterusna banci kang ikataken Tegun Siparibanen.

4.       Senina sendalanen emekap, ersenina erkondangken  sada Kalimbubu, atau kata sideban adi impalta I empoi kalak ras sipengempoisa enda kita enggo sendalanen.

5.       Senna Sipengalon, emekap Ersenina erkiteken enggo sada Pengalonna bas sada jabu. Emekap sada Singalo Tukur,  sada Singalo ulu Emas. Singalo Tukur ras Singalo Ulu Emas ndai ikataken Sepengalon.  Secara luas ikembangken tua-tuanta siadi ka, makana dua kalak ersenina ejabu ka duana, ku Kalimbubu sidua si erdeba ndai, ikataken, seri pengalon na

 

 

Kabanjahe, Oktober 2018

Penulis,

 

KASIM GINTING SUGIHEN, BA

Pensiunan PNS

Anggota Lakonta Kab. Karo / Koordinator Juhar

 

 

TUTUR IBAS KALAK KARO

I.                     Adi Kalak Karo, ertutur lit 6 unsur si harus si eteh, emekap:

-          3 si arah Bapa

-          3 si arah Nande

 

3 siarah Bapa :

1.       Merga/Beru

2.       Bere-bere Bapa (I gelari Binuang)

3.       Bere-bere Laki ( I gelari Kempah)

 

3 siarah Nande :

1.       Bere-bere (eme beru Nande)

2.       Kempu (eme bere-bere Nande)

3.       Soler (eme Perkempun Nande)

 

II.                  Jenis Anak ibas Kalak Karo

Ibas Budaya Karo, lit piga-piga pengertian anak, antara lain :

1.       Anak Ipupus, emekap anak silahir bas perkawinan resmi

2.       Anak Ibaba, emekap anak si baba nandena waktu ia sereh

3.       Anak si Perkuahken, emekap anak anak sibuatna/ibahanna Nande-Bapana I bas sada kuta, dll

4.       Anak Lakoman (siadi, gundari lanai lit), emekap anak si tubuh I bas perkawinan silang I tengah keluarga, adat na hanya manok Rames

5.       Anak Karang (siadi, gundari lanai lit), hamper serir as anak Lakoman, bedana enda la erdalan manok rames, cumin perkawina silang, enda masih bas SADA KARANG, atau bas lingkungan keluarga denga

 

III.                Ente, Entah, dst…

 

Adi pemaham secara umum, Ente ikataken anak ibas kempu , Generasina emekap :

-          Kempu, generasi ke-3 (tiga)

-          Entah, generasi ke-4 (empat)

Erkiteken gedang umur si tua-tua siadi, seh datna kempuna generasi ke-4, tah pe generasi ke-5.  Sempat ia terbelas, “ Entah nge, tah lang, lanai ku eteh pe oratna, nina”.

 

IV.                Penertian Kela ras Bere-bera, Permain ras Permen

-          Kela, eme perbulangen/dilaki/singempaoi anakta sideberu

-          Bere-bere, eme anak turangta, tehpe anak turang impalta

-          Permain, eme ndehara anakta sidilaki

-          Permen, eme anak impalta (kaliembubu), entahpe anak impalta (puang kaliembubu.  Enda banci ipakeken ku anakna si dilaki pe

 

KASIM GINTING SUGIHEN, BA